Ferie – Hong Kong

Ja ferie, grossi ferie sogar. Mir händ eus scho fasch voremene jahr entschiede d’eltereferie uusznütze und mit eusne beide meitli und de mormor e asie-tour zmache. Mir sind dänn also aafangs März uf Züri gfloge goge d’mormor abhole, und sind dänn ein tag spöter mit de ganze truppe uf Hong Kong wiitergfloge. Det simmer dänn grad mit em Airport Express und de Star Ferry uf Kowloon in YMCA Hotel gange. Det hämmer e super family suite gha wome schön über de star ferry pier etc gseh hät. Es wätter isch viiiil besser gsii als dihei, mer händ doch immer über 15-20° gha. (more…)

Helsingborg

So, mir sind iizoge i eusi neu wohnig. Es isch e 136 kvadratmeter grossi wohnig im vierte (oberschte) stock imene huus wo grad amene grüene streife quer dur d stadt liit. Uf de einte siite hämmer en park, und uf de andere siite de blick über es einfamiliehüüsliquartier. Und wänns kei näbel hät gsehmer sogar en streife vom Sund und uf de andere siite, z’Dänemark, Helsingør. (more…)

Di letscht nacht z Slangerup…

Vili wüsseds ja scho – bi eus staht e grösseri veränderig vor de tüür: Ab morn wohned mir z Helsingborg…  :-)

Mir sind hüt goge d wohnig übernäh, und händ es erschte zvieri picknick gha. Und morn tömmer dänn ernschthaft zügle. Mer gönd mit gmischte gfühl: Uf de einte siite simmer jetzt 4.5 – 5 jahr z DK gsii und händs guet gha da. D’Andreina hät e super vuggestue und en geniale schwümmklub gha. Uf de andere siite isches au spannend mal öppis neus z’mache, und mal ide stadt z’wohne. Mal luege wies dänn usechunnt. Mer probiered dänn wider e chli fliissiger z brichte – isch dänn au eifacher well alles neu isch. Bis bald also wider uf däm sänder!

Fredy Schäpper – zum letschte

So, am sunntig isches jetzt sowiit gsii. Em Fredy sin körper isch kremiert worde. Am samschtig hämmer na abgmacht gha, dass ich ca. am 12i es telefon überchume, wänn dasi abgholt wür. Aber dass es ganzi am 4i aafangi. Am sunntig am 12i natürli keis tel, ich han mal es sms gschribe. Kei antwort. Han dänn in wiiser vorussicht am 2 zmittag gässe. Und promt hät am halbi 3 es telefon glüte, si warted jetzt ide lobby. Und ich ide badhose am pool (es zimmer hani ja scho am 12i möse abgäh)… Zum glück hani au das halbi iigrächnet gha und han mi im behinderete-wc vom poolgänger zum beerdigungsgänger gwandlet. (more…)

Es Schäppers gönd eis wiiter…

Welli grad so schön am schriibe bin, da hani tänkt chönti doch grad wiiter mache.

Bi eus isch ja eigentli en huufe gloffe. So vil dass mer gar nie ziit gha händ zum blog schriibe. Ich fange vorne aa, au wänn dänn es paar sache vermischt würed.

Nach de Malin ihrere geburt han ich zerscht 2 wuche papiferie gha, was wider mal ganz guet gsii isch. Well schliessli hämmer jetzt ja plötzlich dopplet so vil arbet wie vorher. Tönt ja logisch, ich hett aber gliich nie tänkt dases eso e umstellig isch. D’Andreina hät es neue schwöschterli eigentli guet in empfang gnah. Si isch amigs chli übermüetig gsii mit dämm chliine baby, und ab und zue isches au mit ihre dure gange und si hät de Malin eis möse haue oder chlüübe oder so… Aber eigentli isch si ganz e liebi…   ;-) (more…)

Fredy Schäpper – fortsetzig

So, nachdem de papi geschter (zischtig) ufbahret worde isch würed di nöchste täg bruucht zum de lüt ermögliche verbiizcho. Und am sunntig sötter dänn kremiert werde. All die bsuechstäg laufed eigentli gliich ab:

Am morge früeh tuet d’Jane und familie (die händ im wat gschlafe, grad vor em sarg, well me törf ja de papi-geischt nöd elei lah) de mönch z’ässe gäh, so wies d’Thai au susch mached. Ich han mich ines hotel abgseilet, ich chan nöd de ganz tag im wat sitze, han ja eh nüt ztue. Uf all fäll lauft dänn de tag dur nöd würkli öppis – es chömed ev gäscht, und susch würed halt immer meh sache bracht und anegschtellt. Am aafang sinds es paar bluemestrüüs gsii, jetzt sind en HUUFE blueme (strüss und ring und und und), dänn chörb mit all däm woner brucht am neue ort, d.h. gschirr, bschteck, ässe, trinke, chüssi etc etc etc. (more…)

De Fredy Schäpper isch gschtorbe…

Am vergangenene samschtig morge hät eus d’information erreicht, de papi segi ide herzstation im Bangkok Hospital, und es gsächi nöd guet uus. Mir sind dänn verblibe, dass ich mich im lauf vom tag namal mäldi zum luege wies wiitergaht. Am aabig hämmer dänn erfahre, dass er gschtorbe segi. Mir sind dänn i hektischi aktivität verfalle, wo ich z’allererscht mir es flugticket uf BKK gkauft han, und dänn sind da natürli na en huufe suschtigi sache gsii zum organisiere. (more…)

D Andreina isch scho zwei…

Geschter isch eusi gross ( :-)  ) zwei worde. Si hät en riise znüüni übercho ide vugge mit schön gschmückte tisch und frücht und teighäsli und singe und und und. Si isch also ganz geniert gsii…  ;-)

Dihei hämmer dänn de tag dur all gschänkli vorbereitet (ja, si isch wider überschwämmt worde) – si isch gar nümm zum stuune usecho ab all däne sache. Zum teil hät sis gar nanig so richtig chöne registriere. Aber das chunnt scho na.

Au all grossi schwöschter macht si sich guet, wänn si uufzellt isch jetzt d’Malin au scho debii und si wett si gern immer wider hebe und streichle. Ich glaub das chunnt guet…

Malin

Geschter (3.6.2010) namitag hät d’Andreina es chliises schwöschterli übercho. D’Malin isch inere wassergeburt usegflutscht und hät eus dänn grad e chli möse aabrüele. Si isch 3600g schwer und 54cm gross und so gsund wieme nume chan sii.

Die beide fraue händ im spital übernachtet und sötted hüt heicho. Und dänn würds spannend zum gseh wied Andreina reagiert…   :-)

Ferie z Porto Santo

Ich han ändi Mai mini diss abgäh  (jupiiiiiiiiii)  :-)  und zur belohnig für die strapaze i de vergangene jahr han ich eus drum ferie z Porto Santo (ghört zu de Azore und liit grad näbed Madeira) gschänkt. Es hät au grad passt mit de Simi ihrerer schwangerschaft – bim heiflug wär si grad ide 35igschte wuche gsii, und bis zu de 36igschte törf me problemlos flüge. (more…)

Next Page »