Damit d Tag i de Quarantäne sich nöd allzu fescht id längi ziend, hämmer scho im vorus, (also no i de CH) für Beschäftigung gsorget. Das heisst mir händ en grosse Teil vo eusem Gepäck mit Spiel- und Bastelsache und Bücher gfüllt.
Bi eus im Zimmer isch natürlich s iPad höch im Kurs. (Mental Gesundheit gaht da über de pädagogisch wertvolli Nutze…) Au sehr beliebt sind d Hörspiel. De Lau loset bis zum abwinke “Der kleine Drache Kokosnuss und die Wetterhexe” und d Gry chan stundenlang irgendöppis lose und zum Fenster uselege.
Au en guete Tip isch “Malen nach Zahlen” und “Diamond Painting” gsi. Vorallem ich chan mich sehr guet damit beschäftige. Da machts au nüt, wenn ich all 5 Minute wieder vo eme Chind unterbroche wirde.
