Use hütig Usflug hat eus zur Bukit Timah Railway Station gfüehrt. Vo deht us cha mer de Schiene vo de alte Zugverbindung vo Singapur nach Malaysia na laufe. Mängisch gseht mer no die alte Gleis, aber en grosse Teil vom Weg isch es en Chieswäg mit links und rächts Bäum und vill grüen.
Es hät rächt vill Lüüt gha wo deht sind ga spaziere, jogge und Velo fahre. Für eus Landeier isch es nur bedingt speziell gsi. Chli wie z Nossike eifach mit andere Pflanze links und rechts. Aber es isch es Stuck “wildi” Natur i de Grossstadt.
S Highlight isch aber ganz klar gsi, wo mer zerscht e Eidechse und grad nachher no Affe gseh händ. Das begegnet eim z Nossike nöd ;-). De Lau is total fasziniert gsi devo, wie d Echse mit de Kralle i de Erde grabet und Würm gsuecht hät. D Mädels sind meh vo de Affe azoge worde.
Nach öppe 2km simmer wieder mit Bus und Metro richtig heizue. (Die ganz Strecke wär 13.3km) Ich ga Brötli bache für d Andreina und die andere in Pool ga abchüele.