Bald Oktober…

… und mir sind sit 7 wuche ide wohnig, d chind sit 6 wuche ide schuel und ich sit 4 wuche am schaffe… es isch nümm alles neu, und doch simmer nanig da dihei. Erschti sache falled eus eso langsam uuf wo mer vorher gar nöd gmerkt oder au nöd draa tänkt hät. Ziit für e gedanke-leerete, so völlig unstrukturiert:

• D lüüt da sind im grosse ganze seeeehr fründlich. Segis zu eus erwachsene, na meh aber na zude chind. Wo dSimi mitem Lau isch goge spaziere sinds zumene maa cho wo drache flüge lah hät. Dä hät dänn eifach em Lau de drache gäh zum probiere.
• Im zug/metro oder em bus stönd d’lüüt sofort uuf wänn en älteri person inechunnt. Na viiiieeeel meh als ide schwiiz.
• Mer merked jetzt wases heisst z’Singapur z’wohne in bezug uf herkunft vode ware. Singapur sälber tuet fascht nüt sälber herstelle, zumindest was ässe aagaht. Eier macheds z.T. da, fascht alles anderi würd importiert. Fleisch (6 millione hüehner pro tag!!!!) vo Malaysia, milch us Thailand oder au Japan, frücht vo Südafrika, Australie oder Neuseeland. Interessant für mich isch z.B. dass sache us Australie für euch plötzlich “akzeptabel nöch” sind – glutenfreii bratesauce isch jetzt grad underwägs zu eus.
• Es uswärts ässe isch für eusi (CH) verhältnis extrem billig, zumindest dänn wänn me nöd i di richtige restaurants (oder de McDonald) gaht. Die hawkers centers (= fress-etage) häts überall wieder, mit enere grosse uuswahl a asiatische gricht. Es gricht choschtet irgendwo 6 singapur dollar = 4 Franke. Sprich, me chan sichs guet leischte zum öppe emal mit de ganze familie goge ässe (hole).
• Es würd bim gschirr & bschteck underschiede zwüsched “normal” und halal, sogar bide rückgabe-statione würd glueget dass es richtige as richtige ort chunnt.
• Britischi aastah-kultur: Bide metro wartet me näbed de türe bis dass d’lüüt dusse sind. Und bide büs häts bahne wo mer tuet aastah und dänn schön de reihe nah iistige. Überhaupt isch de ÖV ganz aagnähm zum reise, abgseh devoo dass mer nöd weiss wänn de zug/bus fahrt und dases zum teil scho na lang gaht, grad wänn mer mit em bus underwägs isch. Si händ zwar en dichte fahrplan aber ohni fixi abfahrsziite. Defür mueme bide metro nie lang warte, am morge fahrt all zwei (!) minute e metro ab in richtig stadt.
• Es reise mitem ÖV isch sehr günschtig – wänn ich täglich würd 50 minute is büro pendle würd das ca 500 franke pro jahr choschte… Und es system mit de prepaid charte isch sehr praktisch (und de Lau zahlt au da erscht mit 7bni).
• Covid: D lüüt da sind sich extrem ad (fascht) “0 covid” strategie gwöhnt. Und tönd sich jetzt unheimlich schwer mitem uufmache. Si (d lüüt und d regierig) reagiered ähnlich wie mir ide schwiiz vor 1.5 jahr reagiert händ: Si händ extrem angst vor aasteckige (trotz de >80% impfrate) sodass zum biispiel primarschuel-eltere ihri chind nümm id schuel schicked wells ide sek 1 positive fall gäh hät. Es würd dänn au immer grad alles zuegmacht und desinfisziert. Und es contact tracing isch anschiinend zum teil glich langsam wie bi eus 🙂 . Si händ au müeh sobald d fallzahle gege 1’000 gönd (jetzt sinds scho fascht bi 2’000), obwohl d intensivstatione – fäll immer (na) sehr tüüf sind (jetzt grad ca 30).
• Zum teil sinds dänn au wieder extrem inkonsequent: Bim arzt warted dänn x lüüt uf sehr chliinem ruum wo d’abständ nie chönd ighalte werde. Oder dass di under 12-jährige zwar nöd törfed g’impft werde aber nume g’impfti törfed ohni maske sport mit engerem kontakt triibe. Defür mueme sich überall mit em TraceTogether token (= contact tracing dings) iilogge, z.B. wänn mer gaht goge poschte oder goge ässe.
• Regelmässigs teschte isch au ganz höch im kurs, ich törf z.B. 1x pro wuche en PCR test goge mache damit ich ab und zue törf ufs schiff gah.
• D singapurer chönd na viel wäniger ohni natel läbe als d schwiizer. Überall, sogar während em laufe händs es telefon ide hand und lueged irgendöppis oder mached spieli. Eigenlich wäri dass für eusi meitli de 7ti himmel 🙂 , nume d eltere tönd schwierig.