Lutschte Sunntig sind d Malin und ich zäme en Usflug ga mache. Mir sind bim Gardens by the Bay ga de Flower Dom und de Cloud Forest aluege. Es isch immer wieder spannend, wie verschiedene Teil vo Singapur ganz anders usgsehnd. Mir sind also vom eher chinesischen Teil wo mir wohnen is Finanz Zentrum vo Singapur gfahre. Hochhüüser, usepützlet – anders als bi eus in Boon Lay.
S erste wo d Malin geh hät sind die riesige rote Metallbäum gsi. Scho da hät sie afange strahle und hät gmeint: ” Die hani scho immer welle gseh! Hüt wird en Traum wahr.”
Im Flower Dome ine häts en Huufe Blumen und Kaktee zum aluege. Zwüsched dure häts immer wieder Skulpturen, grossi und chliini. Mir händ vor allem lebensgrossi Tierfigure us Holz- und Wurzelstück iidruck gmacht. Aber au d Kaktee und d Blumen sind sehr schön gsi.
Nach chli meh als ere Stund simmer dann in Cloud Forest gwächslet. Das isch e Halle mit eme “Berg” i de Mitti. De Berg isch mit allerlei Pflanze bewachse und vo ganz oben aber chunt en Wasserfall. Zuesätzlich isch er inne hohl und mer chan uf verschiedene Etage dure laufe. Usse am Berg häts uf unterschiedliche Höchene Metallsteg wo mer drauf chan spaziere. Au das hät de Malin sehr guet gfalle.
Uf em Wäg zu de Metro simmer dann – sehr zur Freud vo de Malin – no durs Marina Bay Sands Gebäude / Hotel duregloffe. Das isch das riesige Huus wo usgseht wie es Schiff oben. Uf em Bild stand mer grad unde dra.
