Was mache mit vier chind wo vor energie sprudled – aber all sache wie z.B. de zoo sind nume i 2er grüppli machbar? Me gaht inen park, vo däne häts z Singapur zum glück en huufe. Aber dänn na eine finde wo allne altersgruppe gerecht würd? Tricky. Mer händ gläse, de Admirality Park segi öppis guet, also sind d’chind und ich loszoge zum das teste.
De Admirality Park liit im norde vo Singapur, enere region womer na gar nie gsii sind.
Mit zwei mal MRT und e chli laufe simmer det aacho und sind grad als erschts vo rutschene begrüesst worde. D’experte händ dänn zwar blitzartig (d.h. grad nach em schueh abzieh) gfunde, das segi also scho e chli bubi und sind grad wiitergraset.
De vater hät also schueh und täsche und wasserfläsche g’schulteret und isch hinderhergwagglet. De park isch imene chliine tääli iibettet und es hät überall rutschene gha, au settig wo dänn zuespruch vode chind gfunde händ.
Es hät sogar local wildlife ghaa – ein aff hät sich sogar erdreischtet zum di eint ruschbahn bsetze!
Nach emene stündli hämmer eus dänn uf de wäg gmacht in richtig meer, das isch ca en kilometer wandere dur de wald.
Underwägs hämmer na en chliine abstecher inen mangrovewald gmacht, det hämmer dänn wieder emal en leguan gseh.
Schliesslich simmer ufen pier usecho wos es chliises resti hät (glacé!!!!) und mer hät chöne uf Malaysia übereluege. Nachher häts dänn au glanget und mer händ eus uf de heiwäg gmacht zum im pool chöne abchüele.
