Welcome to Singapore!

So – di erschte hürde sind gschafft! Mer händ am friitig all en negative test gmacht (susch hettemer ja gar nöd törfe flüge) und sind dänn am samschtig mit liechtem gepäck an flughafe. Det isches gar nöd esooo leer gsii wiemer erwartet händ, aber am check-in vo de Singapore Airlines isch fascht niemerd underwägs gsii.

Det hämmer dänn möse gfühlti 1’000 dokument vorlegge: Pass, Covid Test, Visums-Bestätigung, Iireisebestätigung – und alles gnauestens aaglueget und iitippet. Guet 30 minute spöter hämmer eus dänn törfe richtig passkontrolle bewege und eus vo eusem escort- & chauffeurteam verabschiede. Nachdem mer eus über d priority lane elegant ade kolonne verbiigschmugglet händ isches gepäck gröntget worde. Nach de churze fahrt im zügli is Terminal E isch dänn pünktlich am 11:10 es boarding losgange – und au ganz gschnäll wieder fertig gsii. Für dä ganzi flüger häts nume öppe 30 passagier gha! Isch also scho fasch en privatjet gsii. Wie mers vo de SQ kännt isch de service tiptop gsii – d stewardesse händ sich sogar gfreut dass d chind all 30 minute sind goge nach snacks fröge! Natürlich, wies bimene tagflug eso isch, hämmer nöd möge schlafe während däne 12 stund flug, händ defür x film glueget und spieli gschpilt und chips gässe.

Nach de landig simmer grad am endi vode gangway vo de erste lüüt i schutzmontur (mundschutz, visier, händsche und emene rägemantel-ähnliche blaue überwurf) in empfang gnah worde wo eusi boarding passes mit ihrere liste vergliche händ. Vo det uus wiiter dur de leeri flughafe zude immigration womer wieder händ möse x papier zeige, föteli mache lah und d tüümeabdrück scanne lah. Isch natürli wieder eeewig gange, und eusi chind (und mir) überhaupt nöd müed, isch doch scho mitternacht gsii für eus. Bi däne wänige passagier isch euses gepäck natürli vor eus parat gsii und mer sind dänn gschwind dur de zoll gschlüpft, samt em rucksack voll ässe fürd Andreina. Nöd z’vergässe, überall natürli begleitet vo fründliche blaue männdli und fraueli.

Wiiter zum nöchschte covid test – papier zeige, tippe, warte und zur nöchschte station. Schlussendlich dänn de test sälber mitem stäbli zerst im muul und dänn na ide nase, zum glück nöd eso wiit ue wie mir das känned. Und dänn veruse ad wärmi und uf de bus is hotel warte. Au das isch wieder gschnäll gange – euse privat reisecar hät eus dänn is Holiday Inn Atrium gfahre womer – wie nöd andersch z’erwarte – de papierchrieg erledigt händ und dänn schliesslich rund 3 stund nach de landig i eusne zwei hotelzimmer aacho sind für Tag 1/14 vo eusere quarantäne. Simi, Gry & Lau im einte zimmer und Malin, Andreina und ich imene andere.